कोसीमा थापाले देखाएको उदारता : दलको नेताबाट राजीनामा,कार्कीलाई सहयोग

काठमाडौं । आफू पटक पटक राजनीतिक कोपभाजनमा पर्दापनी कोसी प्रदेश संसदीय दलका नेता थापाले उच्च राजनीतिक उदारता र नैतिकता देखाएका छन् । थापालाई २ पटक मुख्यमन्त्री बनेर पनि अदालतले अपदस्थ गरिदियो । तर, थापाले संसदीय राजनीति र पार्टी राजनीतिलाई गुण लगाए ।

कोसी प्रदेश नेपाली कांग्रेस संसदीय दलका नेता उद्वव थापाले राजीनामा दिएका छन् । उनले आज कांग्रेस संसदीय दलको नेताबाट राजीनामा दिएका हुन् ।

केन्द्रीय गठबन्धन र प्रदेश कार्यसम्पादन समितिको निर्णय विपरित कांग्रेसको शेखर कोइराला समूहले केदार कार्कीलाई मुख्यमन्त्री बनाएपछि थापाले संसदीय दलको नेताबाट राजीनामा दिए । आफूले नैतिक रुपमा राजीनामा दिएको बताएका छन् । कांग्रेसकै प्रदेशसभा सदस्य केदार कार्की पार्टीबाट विद्रोह गर्दै बहुमत जुटाएर मुख्यमन्त्री बनेपछि थापाले राजीनामा दिएका हुन् ।

राजनीतिक घटनाक्रममा एउटा कारक आफू पनि भएको भन्ने सोच बनाएर राजीनामा दिएको उनले बताएका छन् । मुख्यमन्त्री बन्नु र आफ्नो राजीनामा दिनु संयोगमात्र भएको थापाको भनाइ छ ।

“मुख्यमन्त्री केदार कार्की हुने र आफूहरु प्रतिपक्ष हुने होइन उहाँ गठबन्धनकै मुख्यमन्त्री हुने सम्भावना छ,” उनले भने । उनले अब दलको नेता सहमतिमा फेरि चयन गर्ने बताए । विश्वासको मत लिँदा संख्या नपुगेमा आफूहरुले पनि मत हाल्ने उनले स्पष्ट पारे ।  केन्द्रको निर्देशन अनुसार अघि बढ्ने बताएका थापाले मुख्यमन्त्रलाई विद्रोही भनेर आफूहरुले नठानेको बताए । कार्की नेतृत्वको सरकार २०८४ सम्म रहने उनको भनाइ छ ।